’U Sfrattu: no o ponti

‘U piscispada dissi a lu ‘ntrasattu
«Ahiài! Ahiài! M’arruàu ‘u sfrattu!»
«Chi vai dicennu, pezzu di minchiuni?»
Dissi ‘a murina misa ‘nta ‘na gnuni.
«A freu d’acqua cci su’ coppa ‘i matteddu!»
Rispunni scantatu u luvareddu.
‘U pruppu inveci dissi: «Mi ni futtu:
tempu nenti i vestu trutti a luttu».
A tappu si ‘ntricau ‘a ciciredda
«Cci penzu iò pi ‘sta cumacca bedda
aùnni assummu è sempri malanova…
Mi ‘ttaccu a tutti iò a giru i bova».
«Nisceru pacci – dissi lesta ‘a pìchira –
Un coppu ‘i scossa e cumenzu da chìchira».
Cci mannaru ‘u sfrattu a Scilla e Cariddi,
mustri di rema e di mari friddi.
«Matricedda! – dissi lesta ‘a ‘ncioiarina –
‘u funnali divintiravi ‘na latrina.
A cu non nesciravi du carrùggiu
Cci ‘ssintirannu coppa d’archibbùggiu».
Ca feli a bucca ‘a Fata Muggana
‘ssistìa ‘llunata a ‘ddu scinni e ‘nchiana.
«Sfrattu! Sfrattu! Sfrattu cc’è pi tutti!».
Dicia u piscispada ittannu rutti.
Erunu ‘mmasati i pisciceddi,
i baùsi, i opi, i iaiuleddi.
«Figghiazzi di buttana, chi cunnanna!
Non nni bastava rizza, lenza e canna?»
Rispunnìu Cola du postu fissu:
«Mi cci veni a tutti ‘nu subbissu!
Non cianciti, non vi sbarruàti:
non ci niscemu mancu a cannunati».
E dissi mutu mutu e sotu sotu:
«Pi tutti ci penzu iò c’un marimotu.
E non bi dispirati, amici mei,
muriravi Sansuni cu tutti i Filistei!».