Ho deciso: mi ccattu na motolapa!

di Peppino Restifo -

‘Nta tuttu stu casinu ca fannu pu Ponti, ministri, ‘ngigneri, jurnalisti, mi pari di capìri ca cc’è na sula cosa seria: vonnu japriri ddù canteri, unu ‘e Cuntissi e unu a mmenzu ‘i Ganziri e u Faru. Mu spiegau bbonu a Gazzetta.

E iò mi ccattu na motolapa. Mi dici ‘na statistica ca ‘nta ognuna di nostri casi ci sunnu sessantamila oggetti. Allura, prima di scassari i casi ‘e Cuntissi e ‘e Ganziri, m’appresentu ca motolapa e jutu a ffari u traslocu. Ppi unni non si sapi, ma c’è u traslocu.

Appoi s’hann’a tagghiari l’albiri, l’erba, ruvetti e macchi. E iò ca motolapa cci portu all’isola ecologica.

Appoi cumincia u movimentu terra… e ddocu a cosa si fa cchiù pagghiusa. Con rispetto e deferenza aviss’a chiedere permesso a certi amici dill’amici. Circai sull’internet l’indirizzo di Mafia SpA, ma non s’attrova. C’avissi a dumannari a Prifittura o a Dia du Tribunali: capaci c’u sannu. Accussì pozzu fari dumanna: ppi favuri non mi bruciati a motolapa! Ci ho ‘nvestito i miei risparmi…

U vecchiu sinnicu mi dissi c’a tera s’hav’a purtari a Venetico, Torregrotta e Valdina. Bbonu: putissi fari puru quattru viaggi o jornu ca mè motolapa.

E poi a duminica mi caricu a nonna supra a seggia ‘nto cassuni assemi a figghi e niputi ca fannu vuci; a mè mugghieri a ssettu ‘nta cabina e si mi resta spaziu giru u manubriu. Nni jemu tutti a mari e poi a manciari i cozzi ‘è Ganziri, fin’a quannu cci sunnu.

Qualcuno potrà dire: aspirazioni miserabili a fronte di 14 miliardi di progetto. Ma intantu fazzu cuntenta a Cisl…