ANNU NOVU, BON VINUTU !

di Mico della Boccetta -

Veni avanti, bon vinutu
annu nòvu, ti salutu!
Chi nni pòrti, 'ntà ddi sàcchi?
Di cambiali fasci e pacchi?
Sunnu tàssi, sùnnu aumènti,
su' mannàti di cattùra
ppi la genti priputènti?
Sunnu auguri? Su' saluti?
Su' fiscàli ricivuti?
Vèni avànti, alla bonùra...
Fàmmi vìdiri chi c'è
'ntà 'stu paccu: 'varda un po' ...
c'è 'na pipa! Ppi cu' è?
Mi lu dici, si o no?...
D'acqua viva c'è n'à fonti,
c'è un "marine", cci sta un Ponti;
c'è un triatu, un "palazzettu" ,
tanti casi ai senzatettu...
C'è un cartellu, vidu scrittu:
(annu novu benidittu!)
- Cancillatu sia ogni mali,
sia vacanti ogni spitali,
sia vacanti 'a farmacìa,
e di genti china sia
tutti i jorna, 'a piscarìa!...
Veni, tràsi, 'un ti n'annàri,
veni, aiùtinni a spiràri
annu novu, ti salutu:
benidittu e bon vinutu!